Google密謀出太陽能隱形眼鏡？

現時隱形眼鏡最邪惡嘅用途莫過於幫女士們「喬妝」變大眼，Google將會發明出令隱形眼鏡變得更恐怖嘅功能。前日佢哋獲批一項新專利——太陽能供電隱形眼鏡，好好哋之所以要發電，係因為佢要感測環境資訊，甚至乎掃條碼，絕非一般con。
專利文件顯示呢副con睇落同普通冇咩差別，但就內置光學感應器、太陽能電池，畀佢將外部光線轉化為電能，包括太陽或人為以裝置產生嘅光。Google希望當中嘅感測技術可以探測空氣中致敏原、有害物質，向配戴者發出相關警告，又打算配合流動裝置或電腦，等佢幫人量埋體溫同血液酒精含量。

咁尖端嘅隱形眼鏡點少得掃瞄器，Google大計內更包含資訊讀取功能，好似行街拎起件貨冇寫幾錢，眼尾稍吓個條碼就知，唔使周圍搵售貨員。佢哋話呢個只係例子之一，若果加入更多識別功能，戴上佢咪人人變做密探？

日期： 23/10/2015
來源：